उटी बु. ग्रामपंचायत !

उटी बु. ग्रामपंचायत च्या डिजिटल पोर्टल वर आपले स्वागत आहे!

उटी (बु.) हे गाव जिल्हा मुख्यालयापासून ३५ किमी अंतरावर आहे आणि तालुका मुख्यालयापासून १३ किमी अंतरावर आहे. हे गाव २४४ लातूर ग्रामीण विधानसभा मतदारसंघ व लातूर (अ.जा.) लोकसभा मतदारसंघात समाविष्ट आहे. हे गाव भादा जिल्हा परिषद गट व भादा पंचायत समिती गणांत समाविष्ट आहे. गावचे ग्रामदैवत जगदंबा देवी असून त्यास तीर्थक्षेत्राचा दर्जा प्राप्त आहे.
सन २०११ च्या जनगणनेनुसार गावाची लोकसंख्या २०५४ आहे. गावात विविध जाती-धर्माचे लोक राहतात, तसेच त्यांचा प्रमुख व्यवसाय शेती असून जोडधंद्यांमध्ये हॉटेल, जनरल स्टोअर्स, मंडप डेकोरेशन, किराणा दुकान, न्हावी दुकान, सुतार, लोहार, दुग्ध व्यवसाय व मजुरी यांसारखे व्यवसाय प्रामुख्याने केले जातात.
गावाच्या बाजूने वाहणाऱ्या तावरजा नदीवर मध्यम प्रकल्प उभारल्यामुळे सदर गावाचे पूर्ववसन करण्यात आले आहे. या प्रकल्पातून शेतीसाठी व उटी (बु.), लखणगाव, आलमला, शिऊर इत्यादी गावे तसेच औसा नगर परिषदेसाठी पाणीपुरवठा केला जातो.
ग्रामपंचायत कार्यालयाची इमारत भव्य असून गावातील सर्व नागरिकांना वेळेवर सुविधा पुरवल्या जातात. ग्रामपंचायतमार्फत सर्व प्रकारचे दाखले संगणकीकृत पद्धतीने दिले जातात.
गावाला सन २०१७-१८ च्या संत गाडगेबाबा ग्रामस्वच्छता अभियानांतर्गत जिल्हास्तरावरील राष्ट्रसंत तुकडोजी महाराज स्वच्छ ग्राम स्पर्धेत पाणी व्यवस्थापन या विषयाकरिता स्व. वसंतराव नाईक पुरस्कार देऊन गौरविण्यात आले आहे.
तसेच सन २०१७-१८ च्या संत गाडगेबाबा स्वच्छता अभियानांतर्गत तालुकास्तरावरील प्रथम पुरस्कार प्राप्त झाला आहे. त्याचप्रमाणे दैनिक लोकमत तर्फे सन २०१७-१८ मधील जलव्यवस्थापनासाठी देण्यात आलेला लोकमत सरपंच अवॉर्ड ग्रामपंचायतीस प्राप्त झाला आहे

उटी बु.च्या गुगल मॅप वर जाण्यासाठी येथे क्लिक करा

Utti (Bk) PAI Score Card